Hilean behineko topaketak dira, idazle edota itzultzailearekin batera solasaldia antolatzen dugu. Horretarako eleberria, ipuin-liburua, saiakera, poesia edota antzerkia lantzen ditugu. Egilea gonbidatzen dugu gure zalantzak konpartitzeko eta sortze prozesuaz gehiago ikasteko. Taldean egoteak, elkarrekin egiteak are gehiago motibatzen gaitu irakurtzera, eta gozatzera. Animatu zeu ere!

Garazi Basterretxea Bareak gidatutako txoko honetan euskal literaturako testuetatik abiatuta, dinamika ludiko partehartzaileen bidez, geure testuak sortuko ditugu. Fikziozko lanen bidez, poemak, ipuinak, narrazio laburrak, sortzeko tresnak garatzen joango gara, eta nahi dugunari buruz idatziko dugu. Txokoa mistoa izango da eta testuak eta dinamikak ikuspegi feministatik hautatuko ditugu.

Hilean behin, ostegunetan, Lizar Begoñak bideratzen duen irakurketa-kluba da, gure egitasmo berria. Talde honen helburua da irakurtzeko ohiturarik ez duten irakurleak, euskara ikasten dabiltzan ikasleak edota euskaraz irakurtzeko ohitura ez duten irakurzale horiengan eragitea.
B1 eta B2 mailako liburuak aukeratzen ditugu, norberak etxean irakurri eta elkartzen garenean liburuaren inguruan gure iritziak, hausnarketak, ulertu ez ditugun kontuak elkarbanatzen ditugu. Asmoa solasaldi atsegina izatea da, euskaraz sortutako zein itzulitako literaturarekin zaletzea eta euskarazko harremanak sortzea.

Euskaraz idazten hasteko eta sormena lantzeko tailerra da Garazi Basterretxeak gidatzen duena. Hainbat ariketen bitartez idazketa moldeak lantzen joaten gara, norberak bere gustu eta interesen arabera moldatzen ditu. Saioetan Getxoko zein Uribe Kostako euskaldunak aritzen gara. Interesa baduzu, esaiguzu.

Zubileta eskolako guraso elkartearen kezka abiapuntua izan da irakurzaletasuna sustatzeko eskolaz kanpoko jarduera hau egiteko. Euskararen erabilera ere bultzatzeko nahiarekin 2019-2020 ikasturtetik aurrera ipuin kontalari tailerra antolatzen dugu 3-5 urteko umeei astean behin ordubeteko saioa eskaintzeko.

Jendea euskarazko liburuak irakurtzera animatzeaz gain, egitasmoak liburuak elkarri oparitzea edo trukatzea ere proposatzen du, harremanak lantzeko praktika gisa. Liburutegian euskarazko liburu bat hartu, eta bueltatzerakoan bete parte-hartze fitxa zure datuekin. Horretaz gain, nori oparituko zeniokeen pentsatu eta lagun horri fitxan bertan idatziozu mezu berezi bat. Egitasmoa amaitzean zozketa bat egingo da parte hartzaile guztien artean eta irabazlea izanez gero zuk irakurritako liburua helduko zaizu etxera, mezua itsatsirik duela.